انسان كے لیے بیماریاں بھی اللہ كی طرف سے ہے تو شفا بھی اللہ نے ہی عطا كرنی ہے۔بہت سی بیماریاں ایسی بھی ہوتی ہیں جن کا اگر علاج نہ بھی كیا جائے تو عارضی طور پر معمولی تكلیف پہنچا كر اپنی مدت پوری كر كے خود بہ خود ختم ہوجاتی ہیں۔دوسری جانب خود علاجی،ناكافی طبی سہولیات ،صحیح علاج نہ ہونے كی وجہ سے كئی مریض زندگی بھر شفا نہیں پاتے۔اس لیے زیر نظر کتاب" طب یونانی میں گھریلو ادویہ اور عام معالجہ "میں ایسے امراض اور ان کا علاج شامل ہے۔ جو روزمرہ کی زندگی میں واقع ہوتےہیں۔مریضوں کی سہولت کے پیش نظرایک ہی بیماری کے لیے بہت سے نسخے تجویز کیے گئے ہیں۔تاکہ وہ جس علاقے میں جو دوا آسانی سے دستیاب ہو ،اسے استعمال کرسکیں۔اس خیال کے پیش نظر تیار شدہ دواؤں کا اضافہ بھی کردیا گیا ہے تاکہ مریض اپنے علاقہ میں آسانی سے ملنے والی کوئی بھی دوا آسانی سے استعمال کرسکیں۔یونانی طریقہ علاج پر مشتمل اس کتابچہ میں وہ نباتی،معدنی اور حیوانی ادویہ درج کی گئی ہیں جوموثر اور بہ سہولت فراہم ہوجاتی ہیں۔جس کے کوئی خراب اثرات نہیں ہوتے اور کم خرچ بھی ہیں۔وہیں کتاب کے آخر میں حفظان صحت سے متعلق ہدایات اور غذاؤں کے بارے میں کچھ مفید معلومات بھی درج کی گئی ہیں۔