اردوادب کے جملہ اصناف کی تاریخ بہت ہی مفصل اور بسیط لکھی جاچکی ہے لیکن بچوں کے ادب کا اہم گوشہ ناقدین اور محققین کی نظروں سے دور رہا اور تاریخ کی کتابوں میں ضمنی طور پر بھی ذکر نہیں کیا گیا تو اس جانب خوشحال زیدی نے نظر ڈالی اور ان کی یہ کتاب ادب اطفال کی تاریخ ، تحقیق و تنقید میں بہت ہی زیادہ محقَق و کارگر ثابت ہوئی ۔ ابھی اگرکوئی بھی ادب اطفال میں کچھ لکھنے کی کوشش کرتا ہے تو اس کو اس کتاب کے مطالعہ سے گزرنا پڑتاہے ۔ اس کتاب میں انہوں نے ادب اطفال کے نظر یات و مسائل کو رکھا ہے جس میں بچوں کی عمر کی مناسبت سے ان کے موضوعات و دلچسپی پر بھی گفتگو ہے ۔ دوسرے باب میں بچوں کی نفسیات اور ادب اطفال ہے اس میں انہوں نے بچو ں کی اندر تقلیدی عمل سے لیکر تخیّلی صلاحیت پر بحث کی ہے ۔ اس باب میں بچوں کی نفسیات کا بہت ہی باریکی سے مطالعہ ہے جو عموما دوسری کتابوں میں پڑھنے کونہیں ملتا ہے۔تیسرے باب میں ادب اطفال کے بنیادی عناصر پر گفتگو ہے جس میں کہانیاں ، ناول، ڈرامے اور شاعری پر بات ہے ۔اس کتاب کے دوسرے حصے میں ادب اطفال کا تاریخی ارتقاء ہے ۔ اس کے علاوہ بھی اس میں بہت کچھ ہے گویا یہ کتاب ادب اطفال پر ایک انسائیکلوپیڈیا کا در جہ رکھتی ہے ۔