اردو افسانہ میں خواتین کی عمدہ اور مضبوط نمائندگی ملتی ہے ، ان کے موضوعات بھی دیگرکے موضوعات سے الگ ملتے ہیں ۔ اکثر خواتین افسانہ نگاروں نے اپنی منفر د اور بلند آواز کے ساتھ افسانوی دنیا میں قدم رکھا ہے ان میں سے ایک واجدہ تبسم ہیں ۔ افسانوی دنیا میں ان کی شنا خت دو بنیادی وجہوں سے ہوتی ہے ایک حیدرآبادی لہجہ اور دوسری خواتین کی نفسیاتی و سماجی زندگی کی عکاسی ہے ۔ اس کے ساتھ ہی جس طر ح جیلانی بانو نے حیدرآباد کے زوال آمادہ تہذیب کو موضوع بنایا ہے اسی طریقے سے واجدہ تبسم نے بھی اس اعلی اقدار والے معاشرہ کے زوال کو پیش کیا ہے ۔ اتر ن ان کا بہت ہی مشہور افسا نہ ہے جس کے متعلق فحش کا بھی الزام لگا ہے۔ جس کے بعد یہ بھی کہا جانے لگا تھا کہ اب اردو افسانہ مغربی افسانے سے آنکھ ملانے کے لائق ہوگیا ہے ۔ الغر ض ایک منفر د آواز رکھنے والی کہانی کار کی یہ کتاب ہے جس کے مطالعہ سے زوال پذیر حیدرآبادی معاشرہ اور آہستہ آہستہ معاشرہ کا مادی اعتبار سے درجہ بندی کی روداد نظر آتی ہے۔ اس افسانوی مجموعے میں چودہ افسانے ہیں جس میں سے اترن چھٹے نمبر میں ہے ۔ افسانوی دنیا سے محبت رکھنے والوں کے لیے ایک مفید کتاب ہے ۔