watan ki sar-zamin se ishq o ulfat hum bhi rakhte hain

vatan kī sar-zamīñ se ishq o ulfat ham bhī rakhte haiñ

khaTaktī jo rahe dil meñ vo hasrat ham bhī rakhte haiñ

zarūrat ho to mar miTne kī himmat ham bhī rakhte haiñ

ye jur.at ye shujā.at ye basālat ham bhī rakhte haiñ

zamāne ko hilā dene ke daave bāñdhne vaalo

zamāne ko hilā dene kī tāqat ham bhī rakhte haiñ

balā se ho agar saarā jahāñ un kī himāyat par

ḳhuda-e-har-do-ālam kī himāyat ham bhī rakhte haiñ

bahār-e-gulshan-e-ummīd bhī sairāb ho jaa.e

karam kī aarzū ai abr-e-rahmat ham bhī rakhte haiñ

gila nā-mehrbānī kā to sab se sun liyā tum ne

tumhārī mehrbānī kī shikāyat ham bhī rakhte haiñ

bhalā.ī ye ki āzādī se ulfat tum bhī rakhte ho

burā.ī ye ki āzādī se ulfat ham bhī rakhte haiñ

hamārā naam bhī shāyad gunahgāroñ meñ shāmil ho

janāb-e-'josh' se sāhab salāmat ham bhī rakhte haiñ

watan ki sar-zamin se ishq o ulfat hum bhi rakhte hain

khaTakti jo rahe dil mein wo hasrat hum bhi rakhte hain

zarurat ho to mar miTne ki himmat hum bhi rakhte hain

ye jurat ye shujaat ye basalat hum bhi rakhte hain

zamane ko hila dene ke dawe bandhne walo

zamane ko hila dene ki taqat hum bhi rakhte hain

bala se ho agar sara jahan un ki himayat par

KHuda-e-har-do-alam ki himayat hum bhi rakhte hain

bahaar-e-gulshan-e-ummid bhi sairab ho jae

karam ki aarzu ai abr-e-rahmat hum bhi rakhte hain

gila na-mehrbani ka to sab se sun liya tum ne

tumhaari mehrbani ki shikayat hum bhi rakhte hain

bhalai ye ki aazadi se ulfat tum bhi rakhte ho

burai ye ki aazadi se ulfat hum bhi rakhte hain

hamara nam bhi shayad gunahgaron mein shamil ho

janab-e-'josh' se sahab salamat hum bhi rakhte hain