koi chehra na sada koi na paikar hoga

koī chehra na sadā koī na paikar hogā

vo jo bichhḌegā to badlā huā manzar hogā

be-shajar shahr meñ ghar us kā kahāñ tak DhūñDeñ

vo jo kahtā thā ki āñgan meñ sanobar hogā

apne sab ḳhvāb na yuuñ aañkh meñ le kar niklo

dhuup hogī to kisī haath meñ patthar hogā

ham se kahtā thā ye nādīda zamīnoñ kā safar

kahīñ sahrā to kahīñ niilā samundar hogā

us ne kuchh bhī na liyā ham se zar-e-gul ke evaz

vo kisī phuul kī bastī kā tavañgar hogā

ham agar hote use sāya-e-gul meñ rakhte

jis ne dhūpoñ meñ jalāyā vo sitamgar hogā

jism kī aag mirā naam bachā.e rakhnā

ab ke sunte haiñ ki barfīlā december hogā

koi chehra na sada koi na paikar hoga

wo jo bichhDega to badla hua manzar hoga

be-shajar shahr mein ghar us ka kahan tak DhunDen

wo jo kahta tha ki aangan mein sanobar hoga

apne sab KHwab na yun aankh mein le kar niklo

dhup hogi to kisi hath mein patthar hoga

hum se kahta tha ye nadida zaminon ka safar

kahin sahra to kahin nila samundar hoga

us ne kuchh bhi na liya hum se zar-e-gul ke ewaz

wo kisi phul ki basti ka tawangar hoga

hum agar hote use saya-e-gul mein rakhte

jis ne dhupon mein jalaya wo sitamgar hoga

jism ki aag mera nam bachae rakhna

ab ke sunte hain ki barfila december hoga