hangama-ha-e-baada-o-paimana dekh kar

hangāma-hā-e-bāda-o-paimāna dekh kar

ham ruk ga.e haiñ raah meñ mai-ḳhāna dekh kar

bā-ehtirām sāġhar-o-mīnā baḌhā diye

saaqī ne merī jur.at-e-rindāna dekh kar

phir yaad aa ga.ī hai tirī chashm-e-mai-farosh

mahfil meñ raqs-e-bāda-o-paimāna dekh kar

hairāñ huuñ un ke dīda-e-hairāñ ko kyā kahūñ

dīvāne ho ga.e mujhe dīvāna dekh kar

tauba kā ehtirām bhī lāzim rahā magar

niyyat badal ga.ī mirī paimāna dekh kar

har āstāñ se garche rahe be-niyāz ham

sajde meñ gir ga.e dar-e-mai-ḳhāna dekh kar

hangama-ha-e-baada-o-paimana dekh kar

hum ruk gae hain rah mein mai-KHana dekh kar

ba-ehtiram saghar-o-mina baDha diye

saqi ne meri jurat-e-rindana dekh kar

phir yaad aa gai hai teri chashm-e-mai-farosh

mahfil mein raqs-e-baada-o-paimana dekh kar

hairan hun un ke dida-e-hairan ko kya kahun

diwane ho gae mujhe diwana dekh kar

tauba ka ehtiram bhi lazim raha magar

niyyat badal gai meri paimana dekh kar

har aastan se garche rahe be-niyaz hum

sajde mein gir gae dar-e-mai-KHana dekh kar