aa chal ke basen hamdam-e-dairina kahin aur

aa chal ke baseñ hamdam-e-dairīna kahīñ aur

maiñ DhūñDh nikālūñgā falak aur zamīñ aur

bachtī huī nazroñ se Tapakte haiñ fasāne

ījād takallum kī huī tarz-e-hasīñ aur

gul-hā-e-tabassum pe nazar Dālne vaale

in hoñThoñ meñ pinhāñ haiñ ka.ī ḳhuld-e-barīñ aur

zau-bār-o-daraḳhshāñ hai ye anvār-e-ḳhudī se

sajdoñ kī siyāhī ko hai matlūb jabīñ aur

ik ashk meñ tabdīl huā apnā sarāpā

kuchh maañg le ulfat se mirī jān-e-hazīñ aur

zulfoñ ko zarā aur bhī āñkhoñ pe jhukā do

maiḳhāne se bādal ko karo kuchh to qarīñ aur

'altāf' mujhe jis ne diyā dard-e-mohabbat

us aañkh meñ kyā aisī koī chiiz nahīñ aur

aa chal ke basen hamdam-e-dairina kahin aur

main DhunDh nikalunga falak aur zamin aur

bachti hui nazron se Tapakte hain fasane

ijad takallum ki hui tarz-e-hasin aur

gul-ha-e-tabassum pe nazar Dalne wale

in honThon mein pinhan hain kai KHuld-e-barin aur

zau-bar-o-daraKHshan hai ye anwar-e-KHudi se

sajdon ki siyahi ko hai matlub jabin aur

ek ashk mein tabdil hua apna sarapa

kuchh mang le ulfat se meri jaan-e-hazin aur

zulfon ko zara aur bhi aankhon pe jhuka do

maiKHane se baadal ko karo kuchh to qarin aur

'altaf' mujhe jis ne diya dard-e-mohabbat

us aankh mein kya aisi koi chiz nahin aur