aa gae wo mere KHayalon mein

aa ga.e vo mire ḳhayāloñ meñ

ghanTiyāñ baj uThīñ shivāloñ meñ

raat ko chiir kar kiran ubhrī

raat ghul mil ga.ī ujāloñ meñ

nigah-e-shoḳh terī kyā uTThī

bijlī kauñdhī kamal ke tāloñ meñ

ek lamha ḳhushī kā kyā kam hai

zindagī kab hai maah sāloñ meñ

dekh kar pal meñ phuul girtā huā

jhurjhurī sī hai husn vāloñ meñ

hāsil-e-zīst hai vahī lamheñ

jo ki guzre tire ḳhayāloñ meñ

jab kiyā zikr be-misāloñ kā

zindagī bas ga.ī misāloñ meñ

māldāroñ se kyā milegā 'habīb'

pā.egā kuchh preshāñ-hāloñ meñ

aa gae wo mere KHayalon mein

ghanTiyan baj uThin shiwalon mein

raat ko chir kar kiran ubhri

raat ghul mil gai ujalon mein

nigah-e-shoKH teri kya uTThi

bijli kaundhi kamal ke talon mein

ek lamha KHushi ka kya kam hai

zindagi kab hai mah salon mein

dekh kar pal mein phul girta hua

jhurjhuri si hai husn walon mein

hasil-e-zist hai wahi lamhen

jo ki guzre tere KHayalon mein

jab kiya zikr be-misalon ka

zindagi bas gai misalon mein

maldaron se kya milega 'habib'

paega kuchh preshan-haalon mein