آ گئی نیند سر شام خدا خیر کرے

آ گئی نیند سر شام خدا خیر کرے

کس لیے مل گیا آرام خدا خیر کرے

تھا تو آغاز محبت کا بہت ہی پر کیف

اور اب تلخ ہے انجام خدا خیر کرے

داستان رسن و دار نہ تازہ ہو جائے

ان کے لب پر ہے مرا نام خدا خیر کرے

بے ارادہ لب مایوس پہ کیوں آیا ہے

شکوۂ گردش ایام خدا خیر کرے

اب نہ میخانے میں وہ اگلی سی رونق باقی

نہ وہ مینا ہے نہ وہ جام خدا خیر کرے

خلش درد ہی مرنے کے لیے کیا کم تھی

اس پہ یہ حسرت و آلام خدا خیر کرے

حسن دل توڑ کے ممدوح جہاں ہے ارشدؔ

ہائے یہ خوئے دل آرام خدا خیر کرے