aa gai sar par qaza lo sara saman rah gaya

aa ga.ī sar par qazā lo saarā sāmāñ rah gayā

ai falak kyā kyā hamāre dil meñ armāñ rah gayā

bāġhbāñ hai chaar din kī bāġh-e-ālam meñ bahār

phuul sab murjhā ga.e ḳhālī bayābāñ rah gayā

itnā ehsāñ aur kar lillāh ai dast-e-junūñ

baaqī gardan meñ faqat tār-e-garebāñ rah gayā

yaad aa.ī jab tumhāre ruup raushan kī chamak

maiñ sarāsar sūrat-e-ā.īna hairāñ rah gayā

le chale do phuul bhī is bāġh-e-ālam se na ham

vaqt-e-rahlat haif hai ḳhālī hī dāmāñ rah gayā

mar ga.e ham par na aa.e tum ḳhabar ko ai sanam

hausla ab dil kā dil hī meñ mirī jaañ rah gayā

nā-tavānī ne dikhāyā zor apnā ai 'rasā'

sūrat-e-naqsh-e-qadam maiñ bas numāyāñ rah gayā

aa gai sar par qaza lo sara saman rah gaya

ai falak kya kya hamare dil mein arman rah gaya

baghban hai chaar din ki bagh-e-alam mein bahaar

phul sab murjha gae KHali bayaban rah gaya

itna ehsan aur kar lillah ai dast-e-junun

baqi gardan mein faqat tar-e-gareban rah gaya

yaad aai jab tumhaare rup raushan ki chamak

main sarasar surat-e-aina hairan rah gaya

le chale do phul bhi is bagh-e-alam se na hum

waqt-e-rahlat haif hai KHali hi daman rah gaya

mar gae hum par na aae tum KHabar ko ai sanam

hausla ab dil ka dil hi mein meri jaan rah gaya

na-tawani ne dikhaya zor apna ai 'rasa'

surat-e-naqsh-e-qadam main bas numayan rah gaya