aa gaya isar mere halqa-e-ahbab mein

aa gayā īsār mere halqa-e-ahbāb meñ

phir kisī sho'le ne paa.ī hai numū barfāb meñ

kah rahī hai sāhiloñ se Dūbne vaale kī laash

maiñ ne paayā hai sukūñ ik muztarib girdāb meñ

kaañp uTThā huuñ varūd-e-bārish-e-mau.ūda par

ġharq hone ko hai saarā shahr sail-e-āb meñ

mere hāthoñ meñ agar taqdīr-e-sub.h-o-shām ho

titliyāñ tā'bīr kī rakh duuñ kitāb-e-ḳhvāb meñ

ḳhaak ke putle ne āḳhir kar diyā ifshā use

dafan thā jo raaz ab tak sīna-e-mahtāb meñ

sāmne kī chiiz meñ 'āsif' nahīñ koī kashish

tak na yuuñ hairat se apne 'aks ko tālāb meñ

aa gaya isar mere halqa-e-ahbab mein

phir kisi sho'le ne pai hai numu barfab mein

kah rahi hai sahilon se Dubne wale ki lash

main ne paya hai sukun ek muztarib girdab mein

kanp uTTha hun warud-e-barish-e-mauuda par

gharq hone ko hai sara shahr sail-e-ab mein

mere hathon mein agar taqdir-e-subh-o-sham ho

titliyan ta'bir ki rakh dun kitab-e-KHwab mein

KHak ke putle ne aaKHir kar diya ifsha use

dafan tha jo raaz ab tak sina-e-mahtab mein

samne ki chiz mein 'asif' nahin koi kashish

tak na yun hairat se apne 'aks ko talab mein