aa gaya yaad tera husn pe nazan hona

aa gayā yaad tirā husn pe nāzāñ honā

sāmne baiTh ke ā.īne ke hairāñ honā

lazzat-e-rīsh-e-jigar ke mutamannī ko ik

vaj.h-e-taskīn hai zaḳhmoñ kā namak-dāñ honā

ek āvāra vatan jā.egā vāpas tab hī

dekhnā chāhe agar ḳhuun kā arzāñ honā

ik qasam khaa.ī hai har baat meñ kaj-bahsī kī

vo har ik baat pe hī dast-ba-dāmāñ honā

jāntā kaun nahīñ hairat-e-jalva hai ik

kākul-e-mushkīñ kā shānoñ pe pareshāñ honā

yaad karte haiñ use kah ke sitamgar phir bhī

hāsil-e-zīst hai vābasta-e-dāmāñ honā

‘ālam-e-jāñ-kanī kyoñ kāhish-e-jāñ ho sālik

bhā gayā marg-e-mufājāt kā āsāñ honā

aa gaya yaad tera husn pe nazan hona

samne baiTh ke aaine ke hairan hona

lazzat-e-rish-e-jigar ke mutamanni ko ek

wajh-e-taskin hai zaKHmon ka namak-dan hona

ek aawara watan jaega wapas tab hi

dekhna chahe agar KHun ka arzan hona

ek qasam khai hai har baat mein kaj-bahsi ki

wo har ek baat pe hi dast-ba-daman hona

jaanta kaun nahin hairat-e-jalwa hai ek

kakul-e-mushkin ka shanon pe pareshan hona

yaad karte hain use kah ke sitamgar phir bhi

hasil-e-zist hai wabasta-e-daman hona

‘alam-e-jaan-kani kyon kahish-e-jaan ho salik

bha gaya marg-e-mufajat ka aasan hona