aa hi jati hai kabhi apne sukun-e-dil ki yaad

aa hī jaatī hai kabhī apne sukūn-e-dil kī yaad

darmiyān-e-qa.ar-e-dariyā jaise ho sāhil kī yaad

dil ko kuchh ulfat sī hai maazī ke sub.h-o-shām se

apnī tanhā.ī kī ho yā aap kī mahfil kī yaad

ruḳh pa zulfeñ haiñ pareshāñ kuchh fasurda se haiñ vo

aa ga.ī hai bhuul kar shāyad kisī bismil kī yaad

miT ga.e ham jis nigāh-e-nāz ke ik vaar se

dil meñ baaqī ab bhī hai us ġhamza-e-qātil kī yaad

aa.e the mahfil meñ terī laakh armānoñ ke saath

jā rahe haiñ dil meñ le kar ik tirī mahfil kī yaad

aa hi jati hai kabhi apne sukun-e-dil ki yaad

darmiyan-e-qar-e-dariya jaise ho sahil ki yaad

dil ko kuchh ulfat si hai mazi ke subh-o-sham se

apni tanhai ki ho ya aap ki mahfil ki yaad

ruKH pa zulfen hain pareshan kuchh fasurda se hain wo

aa gai hai bhul kar shayad kisi bismil ki yaad

miT gae hum jis nigah-e-naz ke ek war se

dil mein baqi ab bhi hai us ghamza-e-qatil ki yaad

aae the mahfil mein teri lakh armanon ke sath

ja rahe hain dil mein le kar ek teri mahfil ki yaad