آ جا اب تو شام کا منظر بھی دھندھلا ہو گیا

آ جا اب تو شام کا منظر بھی دھندھلا ہو گیا

راستوں نے موند لی آنکھیں اندھیرا ہو گیا

بیٹھ کر جس کے کنارے تو نے کھائی تھی قسم

وہ ندی کہتی ہے تیرا وعدہ جھوٹا ہو گیا

کون آیا دھوپ سا اجلا مرے گھر میں جسے

دیکھ کر دیوار کا بھی رنگ گورا ہو گیا

توڑ کے اپنے کنارے اس سے ملنے چل پڑا

اک سمندر پیار میں دریا کے اندھا ہو گیا

شاخ سے پلکوں کی خوابوں کے پرندے اڑ گئے

رہ گئیں ویران آنکھیں دل بھی سونا ہو گیا

ہے گماں مجھ کو کہ آنسو میرے موتی بن گئے

ہے یقیں اس کو کہ دامن اس کا میلا ہو گیا

کر لیا حالات سے سمجھوتا اس نے دوستوں

بے دلی سے ہی سہی پر وہ کسی کا ہو گیا

موسموں میں اب کہاں پہلے سی وہ رنگینیاں

بن تمہارے زندگی کا رنگ پھیکا ہو گیا

جیسے پشتینی حویلی قرضے میں نیلام ہو

ایسے حالتوں میں اک دن دل کا سودا ہو گیا