aa ja ab to sham ka manzar bhi dhundhla ho gaya

aa jā ab to shaam kā manzar bhī dhuñdhlā ho gayā

rāstoñ ne muuñd lī āñkheñ añdherā ho gayā

baiTh kar jis ke kināre tū ne khaa.ī thī qasam

vo nadī kahtī hai terā va.ada jhūTā ho gayā

kaun aaya dhuup sā ujlā mire ghar meñ jise

dekh kar dīvār kā bhī rang gorā ho gayā

toḌ ke apne kināre us se milne chal paḌā

ik samundar pyaar meñ dariyā ke andhā ho gayā

shāḳh se palkoñ kī ḳhvāboñ ke parinde uḌ ga.e

rah ga.iiñ vīrān āñkheñ dil bhī suunā ho gayā

hai gumāñ mujh ko ki aañsū mere motī ban ga.e

hai yaqīñ us ko ki dāman us kā mailā ho gayā

kar liyā hālāt se samjhautā us ne dostoñ

be-dilī se hī sahī par vo kisī kā ho gayā

mausamoñ meñ ab kahāñ pahle sī vo rangīniyāñ

bin tumhāre zindagī kā rang phīkā ho gayā

jaise pushtainī havelī qarze meñ nīlām ho

aise hālatoñ meñ ik din dil kā saudā ho gayā

aa ja ab to sham ka manzar bhi dhundhla ho gaya

raston ne mund li aankhen andhera ho gaya

baiTh kar jis ke kinare tu ne khai thi qasam

wo nadi kahti hai tera wada jhuTa ho gaya

kaun aaya dhup sa ujla mere ghar mein jise

dekh kar diwar ka bhi rang gora ho gaya

toD ke apne kinare us se milne chal paDa

ek samundar pyar mein dariya ke andha ho gaya

shaKH se palkon ki KHwabon ke parinde uD gae

rah gain viran aankhen dil bhi suna ho gaya

hai guman mujh ko ki aansu mere moti ban gae

hai yaqin us ko ki daman us ka maila ho gaya

kar liya haalat se samjhauta us ne doston

be-dili se hi sahi par wo kisi ka ho gaya

mausamon mein ab kahan pahle si wo ranginiyan

bin tumhaare zindagi ka rang phika ho gaya

jaise pushtaini haweli qarze mein nilam ho

aise haalaton mein ek din dil ka sauda ho gaya