aa kidhar hai tu saqi-e-maKHmur

aa kidhar hai tū sāqī-e-maḳhmūr

bhar ke de jām-e-bāda-e-añgūr

koī jām-e-sharāb aisā pilā

jis se shādī kare dil-e-ranjūr

rañj-e-getī se dil mukaddar hai

bhar ke de mai se sāġhar-e-billor

aaj yaum-e-zafar do-shohrā hai

tālib-e-aish hai dil-e-jamhūr

maar kar dev-e-bad ko lanka se

raam aa.e muzaffar-o-mansūr

rām-o-sītā avadh meñ jab aa.e

dil-e-kaushalyā huā masrūr

taḳht-e-lankā diyā vibhīshan ko

jab huā qatl rāvan-e-maqhūr

dil sumitrā kā bhī huā ḳhursand

dekhā lachhman kā jab ruḳh-e-pur-nūr

kaash dashrath bhī zinda hote aaj

thā na īshvar ko ye magar manzūr

dostoñ ko ye din mubārak ho

ho mubārak unheñ ye aish-o-surūr

saal pūchhe agar koī kah do

aaj maarā hai rāvan-e-maġhrūr

aa kidhar hai tu saqi-e-maKHmur

bhar ke de jam-e-baada-e-angur

koi jam-e-sharab aisa pila

jis se shadi kare dil-e-ranjur

ranj-e-geti se dil mukaddar hai

bhar ke de mai se saghar-e-billor

aaj yaum-e-zafar do-shohra hai

talib-e-aish hai dil-e-jamhur

mar kar dew-e-bad ko lanka se

ram aae muzaffar-o-mansur

ram-o-sita awadh mein jab aae

dil-e-kaushalya hua masrur

taKHt-e-lanka diya wibhishan ko

jab hua qatl rawan-e-maqhur

dil sumitra ka bhi hua KHursand

dekha lachhman ka jab ruKH-e-pur-nur

kash dashrath bhi zinda hote aaj

tha na ishwar ko ye magar manzur

doston ko ye din mubarak ho

ho mubarak unhen ye aish-o-surur

sal puchhe agar koi kah do

aaj mara hai rawan-e-maghrur