آ مری جان کبھی پیار کی پہچان میں آ

آ مری جان کبھی پیار کی پہچان میں آ

تو اگر شعلہ ہے تو دیدۂ حیران میں آ

مسکراتا ہوا تو چاند ستاروں سے نکل

اور ہنستا ہوا بھولے سے کبھی جان میں آ

تشنگی ٹھہری بجھانا تو بیاباں پہ برس

گود میں ماں کی اتر دھرتی کے پستان میں آ

دشت وحشت سے مرے اس قدر آساں نہ گزر

چھوڑ آنکھوں کو مری دست و گریبان میں آ

قطرہ قطرہ مری آنکھوں سے مرے دل میں اتر

رفتہ رفتہ مرے سینے سے مری جان میں آ

شورش جاں سے مری ایسے نہ کترا کے گزر

میری سانسوں کا مزہ لے مرے ہیجان میں آ

برگ آوارہ پہ ہی لکھ دے حکایت اپنی

آ مری جان کبھی حرف پریشان میں آ

دیکھ لے اپنی خدائی کا تماشا خود ہی

آسماں والے کبھی پیکر انسان میں آ