aa nikal ke maidan mein do-ruKHi ke KHane se

aa nikal ke maidāñ meñ do-ruḳhī ke ḳhāne se

kaam chal nahīñ saktā ab kisī bahāne se

ahd-e-inqalāb aayā daur-e-āftāb aayā

muntazir thiiñ ye āñkheñ jis kī ik zamāne se

ab zamīn gā.egī hal ke saaz par naġhme

vādiyoñ meñ nācheñge har taraf tarāne se

ahl-e-dil ugā.eñge ḳhaak se mah o anjum

ab guhar subuk hogā jau ke ek daane se

manchale buneñge ab rañg-o-bū ke pairāhan

ab sañvar ke niklegā husn kār-ḳhāne se

aam hogā ab hamdam sab pe faiz fitrat kā

bhar sakeñge ab dāman ham bhī is ḳhazāne se

maiñ ki ek mehnat-kash maiñ ki tīrgī-dushman

sub.h-e-nau ibārat hai mere muskurāne se

ḳhud-kushī hī raas aa.ī dekh bad-nasīboñ ko!

ḳhud se bhī gurezāñ haiñ bhaag kar zamāne se

ab junūñ pe vo saa.at aa paḌī ki ai 'majrūh'

aaj zaḳhm-e-sar behtar dil pe choT khāne se

aa nikal ke maidan mein do-ruKHi ke KHane se

kaam chal nahin sakta ab kisi bahane se

ahd-e-inqalab aaya daur-e-aftab aaya

muntazir thin ye aankhen jis ki ek zamane se

ab zamin gaegi hal ke saz par naghme

wadiyon mein nachenge har taraf tarane se

ahl-e-dil ugaenge KHak se mah o anjum

ab guhar subuk hoga jau ke ek dane se

manchale bunenge ab rang-o-bu ke pairahan

ab sanwar ke niklega husn kar-KHane se

aam hoga ab hamdam sab pe faiz fitrat ka

bhar sakenge ab daman hum bhi is KHazane se

main ki ek mehnat-kash main ki tirgi-dushman

subh-e-nau ibarat hai mere muskurane se

KHud-kushi hi ras aai dekh bad-nasibon ko!

KHud se bhi gurezan hain bhag kar zamane se

ab junun pe wo saat aa paDi ki ai 'majruh'

aaj zaKHm-e-sar behtar dil pe choT khane se