aaali ji ab aap chalo tum apne bojh uThae

'ā.alī' jī ab aap chalo tum apne bojh uThā.e

saath bhī de to āḳhir pyāre koī kahāñ tak jaa.e

jis sūraj kī aas lagī hai shāyad vo bhī aa.e

tum ye kaho ḳhud tum ne ab tak kitne diye jalā.e

apnā kaam hai sirf mohabbat baaqī us kā kaam

jab chāhe vo rūThe ham se jab chāhe man jaa.e

kyā kyā rog lage haiñ dil ko kyā kyā un ke bhed

ham sab ko samjhāne vaale kaun hameñ samjhā.e

ek isī ummīd pe haiñ sab dushman dost qubūl

kyā jaane is sāda-ravī meñ kaun kahāñ mil jaa.e

duniyā vaale sab sachche par jiinā hai us ko bhī

ek ġharīb akelā paapī kis kis se sharmā.e

itnā bhī majbūr na karnā varna ham kah deñge

o 'ā.alī' par hañsne vaale tū 'ālī' ban jaa.e

'aali' ji ab aap chalo tum apne bojh uThae

sath bhi de to aaKHir pyare koi kahan tak jae

jis suraj ki aas lagi hai shayad wo bhi aae

tum ye kaho KHud tum ne ab tak kitne diye jalae

apna kaam hai sirf mohabbat baqi us ka kaam

jab chahe wo ruThe hum se jab chahe man jae

kya kya rog lage hain dil ko kya kya un ke bhed

hum sab ko samjhane wale kaun hamein samjhae

ek isi ummid pe hain sab dushman dost qubul

kya jaane is sada-rawi mein kaun kahan mil jae

duniya wale sab sachche par jina hai us ko bhi

ek gharib akela papi kis kis se sharmae

itna bhi majbur na karna warna hum kah denge

o 'aali' par hansne wale tu 'ali' ban jae