aab-e-dariya hun pyas bhi hun main

āb-e-dariyā huuñ pyaas bhī huuñ maiñ

sab masā.ib se ab barī huuñ maiñ

shab-nigahbān ab tirī huuñ maiñ

surḳh-rū rah ki jāgtī huuñ maiñ

har varaq par milegī pyaas tumheñ

ek rūdād-e-tishnagī huuñ maiñ

vasl kuchh yuuñ bhī hai taḳhayyul meñ

hijr ke giit gā rahī huuñ maiñ

kal amīrī thī maiñ masarrat kī

aaj daulat kī muflisī huuñ maiñ

maiñ huuñ ik munhadim sā darvāza

dāstāñ intizār kī huuñ maiñ

vo sitārā hai shaam kā avval

raat kī āḳhirī ghaḌī huuñ maiñ

jo sadā kū-e-jāñ se aatī hai

us ko duniyā meñ DhūñDhtī huuñ maiñ

sāhib-e-raushnī hai vo 'mīrā'

dam-ba-dam ek tīrgī huuñ maiñ

aab-e-dariya hun pyas bhi hun main

sab masaib se ab bari hun main

shab-nigahban ab teri hun main

surKH-ru rah ki jagti hun main

har waraq par milegi pyas tumhein

ek rudad-e-tishnagi hun main

wasl kuchh yun bhi hai taKHayyul mein

hijr ke git ga rahi hun main

kal amiri thi main masarrat ki

aaj daulat ki muflisi hun main

main hun ek munhadim sa darwaza

dastan intizar ki hun main

wo sitara hai sham ka awwal

raat ki aaKHiri ghaDi hun main

jo sada ku-e-jaan se aati hai

us ko duniya mein DhunDhti hun main

sahib-e-raushni hai wo 'mira'

dam-ba-dam ek tirgi hun main