aabla hai ki ghaw jo bhi hai

aabla hai ki ghaav jo bhī hai

sāmne mere laao jo bhī hai

chaak se ab mujhe utāro bhī

merī sūrat dikhāo jo bhī hai

jo nahīñ us kī kyā pareshānī

ḳhair us kī manāo jo bhī hai

rakh diyā hai tumhāre chugne ko

dard kī fāḳhtāo jo bhī hai

ham tire dar se ab na uTTheñge

terā ham se subhāv jo bhī hai

dost to apne aap bante haiñ

koī dushman banāo jo bhī hai

pā ga.e haiñ tumhārā bhed sabhī

apnā bhaav girāo jo bhī hai

ishq kī bad-duā lagī hai tumheñ

baiThe duniyā kamāo jo bhī hai

muntazir haiñ samā.ateñ sab kī

apnī apnī sunāo jo bhī hai

ye nishānī hai ik payambar kī

ye shikasta sī naav jo bhī hai

jur.a jur.a maiñ pī rahā huuñ 'munīr'

mere dil meñ alaav jo bhī hai

aabla hai ki ghaw jo bhi hai

samne mere lao jo bhi hai

chaak se ab mujhe utaro bhi

meri surat dikhao jo bhi hai

jo nahin us ki kya pareshani

KHair us ki manao jo bhi hai

rakh diya hai tumhaare chugne ko

dard ki faKHtao jo bhi hai

hum tere dar se ab na uTThenge

tera hum se subhaw jo bhi hai

dost to apne aap bante hain

koi dushman banao jo bhi hai

pa gae hain tumhaara bhed sabhi

apna bhaw girao jo bhi hai

ishq ki bad-dua lagi hai tumhein

baiThe duniya kamao jo bhi hai

muntazir hain samaaten sab ki

apni apni sunao jo bhi hai

ye nishani hai ek payambar ki

ye shikasta si naw jo bhi hai

jura jura main pi raha hun 'munir'

mere dil mein alaw jo bhi hai