aabla Khaar-e-sar-e-mizhgan ne phoDa sanp ka

aabla ḳhār-e-sar-e-mizhgāñ ne phoḌā saañp kā

selī-e-zulf-e-rasā ne kallā toḌā saañp kā

panja-e-dandāñ tirī kañghī ne moḌā saañp kā

kar ke gesū-e-kalā.ī haath toḌā saañp kā

kūdkī sī mere sar par ishq-e-gesū hai savār

chob kī badlī banātā thā maiñ ghoḌā saañp kā

bār-e-firaunī pe terī zulf agar bāñdhe kamar

azhdar-e-mūsā ke tausan par ho kuuḌā saañp kā

maiñ huuñ vo ranjūr-e-gesū 'aks agar merā paḌe

mohra-e-har-e-ustuḳhvāñ ban jaa.e phoḌā saañp kā

jab siyah botal se mai-rezī huī daur-e-firāq

maiñ ye samjhā zahr saaqī ne nichoḌā saañp kā

hai qadam us kā havā par paañv us kā ḳhaak par

zulf ke mushkī ko kab paatā hai ghoḌā saañp kā

āshiq-e-zulf-e-siyah ko is tarah ta.azīr do

saañp kī rassī banāo aur koḌā saañp kā

zulf-e-kaj-raftār kī kab chaal chal saktā hai vo

aisī Thokar khaa.e sar ban jaa.e roḌā saañp kā

ek din ho jā.egā raushan siyah-kārī kā haal

donoñ baġhloñ meñ jarīde haiñ ki joḌā saañp kā

jāntā huuñ maiñ tire rās-o-zanab ko ai falak

mere Dasne ke liye paalā hai joḌā saañp kā

kyā ta'ajjub husn-e-jānāñ se agar pūchhe gazand

ḳhaal meñ bichchhū kā joḌā zulfeñ joḌā saañp kā

saañp ke kaaTe kī lahr aa.e jo vasf-e-zulf meñ

'bahr' ne phir to koī mazmūñ na chhoḌā saañp kā

aabla KHar-e-sar-e-mizhgan ne phoDa sanp ka

seli-e-zulf-e-rasa ne kalla toDa sanp ka

panja-e-dandan teri kanghi ne moDa sanp ka

kar ke gesu-e-kalai hath toDa sanp ka

kudki si mere sar par ishq-e-gesu hai sawar

chob ki badli banata tha main ghoDa sanp ka

bar-e-firauni pe teri zulf agar bandhe kamar

azhdar-e-musa ke tausan par ho kuDa sanp ka

main hun wo ranjur-e-gesu 'aks agar mera paDe

mohra-e-har-e-ustuKHwan ban jae phoDa sanp ka

jab siyah botal se mai-rezi hui daur-e-firaq

main ye samjha zahr saqi ne nichoDa sanp ka

hai qadam us ka hawa par panw us ka KHak par

zulf ke mushki ko kab pata hai ghoDa sanp ka

aashiq-e-zulf-e-siyah ko is tarah tazir do

sanp ki rassi banao aur koDa sanp ka

zulf-e-kaj-raftar ki kab chaal chal sakta hai wo

aisi Thokar khae sar ban jae roDa sanp ka

ek din ho jaega raushan siyah-kari ka haal

donon baghlon mein jaride hain ki joDa sanp ka

jaanta hun main tere ras-o-zanab ko ai falak

mere Dasne ke liye pala hai joDa sanp ka

kya ta'ajjub husn-e-jaanan se agar puchhe gazand

KHal mein bichchhu ka joDa zulfen joDa sanp ka

sanp ke kaTe ki lahr aae jo wasf-e-zulf mein

'bahr' ne phir to koi mazmun na chhoDa sanp ka