aadab-e-ashiqi se begana kah rahi hai

ādāb-e-āshiqī se begāna kah rahī hai

merī nazar mujhī ko dīvāna kah rahī hai

har āh-e-sirr-e-paiham dil se nikal nikal kar

dil kī tabāhiyoñ kā afsāna kah rahī hai

is darja hai musallat dīvāngī kā aalam

dīvāngī bhī mujh ko dīvāna kah rahī hai

ye inqilāb-e-daurāñ ye aish-o-ġham ke unvāñ

goyā zabān-e-fitrat afsāna kah rahī hai

merī zabāñ unhīñ se un ke sitam kā qissa

yuuñ dab ke kah rahī hai goyā na kah rahī hai

ai barq-e-fitna sāmāñ unvān taaza koī

ye kyā sunā sunāyā afsāna kah rahī hai

huuñ zinda ik muraqqa.a maiñ sūrat-āfrīñ kā

duniyā 'shakīl' merā afsāna kah rahī hai

aadab-e-ashiqi se begana kah rahi hai

meri nazar mujhi ko diwana kah rahi hai

har aah-e-sirr-e-paiham dil se nikal nikal kar

dil ki tabahiyon ka afsana kah rahi hai

is darja hai musallat diwangi ka aalam

diwangi bhi mujh ko diwana kah rahi hai

ye inqilab-e-dauran ye aish-o-gham ke unwan

goya zaban-e-fitrat afsana kah rahi hai

meri zaban unhin se un ke sitam ka qissa

yun dab ke kah rahi hai goya na kah rahi hai

ai barq-e-fitna saman unwan taza koi

ye kya suna sunaya afsana kah rahi hai

hun zinda ek muraqqa main surat-afrin ka

duniya 'shakil' mera afsana kah rahi hai