aadhon ki taraf se kabhi paunon ki taraf se

ādhoñ kī taraf se kabhī paunoñ kī taraf se

āvāze kase jaate haiñ baunoñ kī taraf se

hairat se sabhī ḳhāk-zada dekh rahe haiñ

har roz zamīñ ghaTtī hai konoñ kī taraf se

āñkhoñ meñ liye phirte haiñ is dar-badarī meñ

kuchh TuuTe hue ḳhvāb khilaunoñ kī taraf se

phir koī asā de ki vo phunkārte nikle

phir azhdahe fir.aun ke Tonoñ kī taraf se

tū vahm-o-gumāñ se bhī pare detā hai sab ko

ho jaatā hai pal bhar meñ na honoñ kī taraf se

bātoñ kā koī silsila jaarī ho kisī taur

ḳhāmoshī hī ḳhāmoshī hai donoñ kī taraf se

phir ba.ad meñ darvāza dikhā dete haiñ 'ādil'

pahle vo uThāte haiñ bichhaunoñ kī taraf se

aadhon ki taraf se kabhi paunon ki taraf se

aawaze kase jate hain baunon ki taraf se

hairat se sabhi KHak-zada dekh rahe hain

har roz zamin ghaTti hai konon ki taraf se

aankhon mein liye phirte hain is dar-badari mein

kuchh TuTe hue KHwab khilaunon ki taraf se

phir koi asa de ki wo phunkarte nikle

phir azhdahe firaun ke Tonon ki taraf se

tu wahm-o-guman se bhi pare deta hai sab ko

ho jata hai pal bhar mein na honon ki taraf se

baaton ka koi silsila jari ho kisi taur

KHamoshi hi KHamoshi hai donon ki taraf se

phir baad mein darwaza dikha dete hain 'adil'

pahle wo uThate hain bichhaunon ki taraf se