آدمی کی شکل میں بھگوان لے آئے ہیں ہم

آدمی کی شکل میں بھگوان لے آئے ہیں ہم

اور اس پر بے طرح ایمان لے آئے ہیں ہم

امتیازی ذہنیت کی ہے نمائش ہر طرف

کس مصیبت میں یہ اپنی جان لے آئے ہیں ہم

ہم ازل سے آج تک پنہاں ہیں اپنی ذات سے

اور دنیا کے لیے قرآن لے آئے ہیں ہم

اہل مغرب نے تو سمجھا ہے خدا انسان کو

اور ہر دن اک نیا بھگوان لے آئے ہیں ہم

دل کی ہر افسردگی کو ضبط کر دیتی ہیں جو

ایسی غزلوں کا نیا دیوان لے آئے ہیں ہم

بے سبب آزار ہے راہبؔ نظام زندگی

خود ہی سر کے سامنے چٹان لے آئے ہیں ہم