aadmi ko dard ka sara ilaqa likh diya

aadmī ko dard kā saarā 'ilāqa likh diyā

haath meñ us ke qalam thā jo bhī chāhā likh diyā

nusrateñ chāho to apne aap se hijrat karo

kātib-e-qismat ne makke ko madīna likh diyā

but-kadoñ ko shoḳhiyāñ diiñ masjidoñ ko hausle

aur peshānī pe merī apnā sajda likh diyā

husn kī āñkhoñ meñ bhar diiñ vādiyāñ kashmīr kī

'ishq kī shorīdgī ke naam sahrā likh diyā

jab suḳhan kā zauq baḌhte baḌhte saudā ho gayā

ek saada ruḳh pe maiñ ne bhī qasīda likh diyā

'ishq kī tashrīh meñ donoñ jahāñ jab kho ga.e

maiñ ne apnā naam kaaTā aur us kā likh diyā

āḳhir-e-shab dil pe utrī dard kī sachchī kitāb

aur bayāz-e-sub.h par ashkoñ ne taiba likh diyā

sahrā sahrā pyaas ke dast-e-hunar ne ai 'ra.īs'

sūkhe hoñToñ kā tabassum dariyā dariyā likh diyā

aadmi ko dard ka sara 'ilaqa likh diya

hath mein us ke qalam tha jo bhi chaha likh diya

nusraten chaho to apne aap se hijrat karo

katib-e-qismat ne makke ko madina likh diya

but-kadon ko shoKHiyan din masjidon ko hausle

aur peshani pe meri apna sajda likh diya

husn ki aankhon mein bhar din wadiyan kashmir ki

'ishq ki shoridgi ke nam sahra likh diya

jab suKHan ka zauq baDhte baDhte sauda ho gaya

ek sada ruKH pe main ne bhi qasida likh diya

'ishq ki tashrih mein donon jahan jab kho gae

main ne apna nam kaTa aur us ka likh diya

aaKHir-e-shab dil pe utri dard ki sachchi kitab

aur bayaz-e-subh par ashkon ne taiba likh diya

sahra sahra pyas ke dast-e-hunar ne ai 'rais'

sukhe honTon ka tabassum dariya dariya likh diya