آدمی نارسا سا لگتا ہے

آدمی نارسا سا لگتا ہے

پھر بھی ظالم خدا سا لگتا ہے

دوستو پارسا نہیں وہ شخص

ہاں مگر پارسا سا لگتا ہے

کیسی بستی میں آ گئے یارو

جس کو دیکھو خدا سا لگتا ہے

اس چمن میں نوائے آزادی

یہ پرندہ نیا سا لگتا ہے

زندگی کون سا مقام ہے یہ

زہر مجھ کو دوا سا لگتا ہے

لوگ جیسے چناب کی موجیں

پیار کچا گھڑا سا لگتا ہے

آج ساحل پہ جس کی لاش ملی

وہ کوئی ناخدا سا لگتا ہے

آدمی پرخلوص ہے زیباؔ

اک ذرا بے وفا سا لگتا ہے