aae baalin pe mere isi-e-dauran ho kar

aa.e bālīñ pe mire īsī-e-daurāñ ho kar

kyuuñ magar baiTh ga.e sar-ba-garebāñ ho kar

raunaq-e-bazm to huuñ sūrat-e-parvāna magar

āzmā.eñ to mujhe sham-e-farozāñ ho kar

na to jiine kā maza hai na sakūñ marne meñ

zindagī rah ga.ī ik ḳhvāb-e-pareshāñ ho kar

ham-nafas pūchh to le hāl-e-nasheman bhī zarā

barq sayyād ke ghar aa.ī gulistāñ ho kar

na rahī tāb-e-nazar lutf-e-tamāshā mālūm

kyā kiyā aap ke jalvoñ ne pareshāñ ho kar

dard bhī tum ne diyā hai to davā bhī tum do

mere pahlū meñ raho dard kā darmāñ ho kar

be-bas itne hue kyuuñ ishq-e-butāñ meñ 'zākir'

kufr bakne lage ik mard-e-musalmāñ ho kar

aae baalin pe mere isi-e-dauran ho kar

kyun magar baiTh gae sar-ba-gareban ho kar

raunaq-e-bazm to hun surat-e-parwana magar

aazmaen to mujhe sham-e-farozan ho kar

na to jine ka maza hai na sakun marne mein

zindagi rah gai ek KHwab-e-pareshan ho kar

ham-nafas puchh to le haal-e-nasheman bhi zara

barq sayyaad ke ghar aai gulistan ho kar

na rahi tab-e-nazar lutf-e-tamasha malum

kya kiya aap ke jalwon ne pareshan ho kar

dard bhi tum ne diya hai to dawa bhi tum do

mere pahlu mein raho dard ka darman ho kar

be-bas itne hue kyun ishq-e-butan mein 'zakir'

kufr bakne lage ek mard-e-musalman ho kar