aae jo mere dil ko to sabr-o-qarar kya

aa.e jo mere dil ko to sabr-o-qarār kyā

us be-vafā ke qaul kā hai e.atibār kyā

ik jām-e-zar-nigār kā kaif-o-ḳhumār kyā

mere nasīb meñ nahīñ parvardigār kyā

parvarda-e-ḳhizāñ huuñ gulistāñ se kyā ġharaz

bahlā sakegī dil mirā fasl-e-bahār kyā

hairat-zada haiñ dekh ke ahl-e-nazar unheñ

duniyā-e-ārzū meñ haiñ naqsh-o-nigār kyā

ġhunche bhī ḳhanda-zan haiñ guloñ par bhī hai nikhār

phir aa ga.ī chaman meñ urūs-e-bahār kyā

bahr-e-jahāñ meñ ziist hai kyā ik habāb hai

is umr-e-be-sabāt kā hai e.atibār kyā

jis ko bhī dekhiye vahī matlab-parast hai

duniyā meñ ab nahīñ hai koī ġham-gusār kyā

ḳhāshāk-e-āshiyāñ meñ mire soz hai nihāñ

'paikāñ' jalā.eñge inheñ barq-o-sharār kyā

aae jo mere dil ko to sabr-o-qarar kya

us be-wafa ke qaul ka hai eatibar kya

ek jam-e-zar-nigar ka kaif-o-KHumar kya

mere nasib mein nahin parwardigar kya

parwarda-e-KHizan hun gulistan se kya gharaz

bahla sakegi dil mera fasl-e-bahaar kya

hairat-zada hain dekh ke ahl-e-nazar unhen

duniya-e-arzu mein hain naqsh-o-nigar kya

ghunche bhi KHanda-zan hain gulon par bhi hai nikhaar

phir aa gai chaman mein urus-e-bahaar kya

bahr-e-jahan mein zist hai kya ek habab hai

is umr-e-be-sabaat ka hai eatibar kya

jis ko bhi dekhiye wahi matlab-parast hai

duniya mein ab nahin hai koi gham-gusar kya

KHashak-e-ashiyan mein mere soz hai nihan

'paikan' jalaenge inhen barq-o-sharar kya