aae na sukun jis ko wo shab-gard hi hoga

aa.e na sukūñ jis ko vo shab-gard hī hogā

lafzoñ meñ bayāñ ziist kā har dard hī hogā

jo zaḳhm bhī apnoñ se mohabbat meñ mile haiñ

ab un kā namak-pāsh bhī hamdard hī hogā

ik dard hai jo dil ko lahū-rang kare hai

ik ġham ke sabab chehra mirā zard hī hogā

garmī hai mizājoñ meñ bahut sāhab-e-dil ke

is vāste lahja mirā ab sard hī hogā

tujh se bhī huā ḳhatm mire dil kā ta'alluq

ab zikr se tere mujhe sar dard hī hogā

shīrāza-e-'ismat ke bikharne meñ mulavvis

dushman ke sivā ghar kā koī fard hī hogā

aae na sukun jis ko wo shab-gard hi hoga

lafzon mein bayan zist ka har dard hi hoga

jo zaKHm bhi apnon se mohabbat mein mile hain

ab un ka namak-pash bhi hamdard hi hoga

ek dard hai jo dil ko lahu-rang kare hai

ek gham ke sabab chehra mera zard hi hoga

garmi hai mizajon mein bahut sahab-e-dil ke

is waste lahja mera ab sard hi hoga

tujh se bhi hua KHatm mere dil ka ta'alluq

ab zikr se tere mujhe sar dard hi hoga

shiraaza-e-'ismat ke bikharne mein mulawwis

dushman ke siwa ghar ka koi fard hi hoga