aae the kyun sahra mein jugnu ban kar

aa.e the kyuuñ sahrā meñ jugnū ban kar

taptī lū meñ halkī sī ḳhushbū ban kar

chalnā, ruknā donoñ meñ barbādī hai

dasht-e-vafā meñ aa.e to ho aahū ban kar

kuchh to ajab hai varna aaj kī duniyā meñ

rahtā kaun hai kis kā ab baazū ban kar

ā.īna-ḳhāna dil kā tab mismār huā

aa.ī haqīqat sāmne jab jaadū ban kar

saarā zamāna sar āñkhoñ par letā hai

rusvā huuñ ghar meñ apne urdu ban kar

kuchh to junūñ ko apne taġhayyur karnā thā

ḳhūn-e-jigar hī bah niklā aañsū ban kar

ruuh meñ bhī kyā utre haiñ ma.anī is ke

yuuñ to sarāpā rahte ho yā-hū ban kar

yuuñ to bayāñ us husn kā karnā thā dushvār

aayā mire ash.ār meñ kuchh pahlū ban kar

kab kar deñ sairāb kisī ko vo, un ke

sar se ghaTā.eñ lipTī haiñ gesū ban kar

un ke ishāre yuuñ bhī qātil haiñ 'ḳhālid'

aur qayāmat hotī hai abrū ban kar

aae the kyun sahra mein jugnu ban kar

tapti lu mein halki si KHushbu ban kar

chalna, rukna donon mein barbaadi hai

dasht-e-wafa mein aae to ho aahu ban kar

kuchh to ajab hai warna aaj ki duniya mein

rahta kaun hai kis ka ab bazu ban kar

aaina-KHana dil ka tab mismar hua

aai haqiqat samne jab jadu ban kar

sara zamana sar aankhon par leta hai

ruswa hun ghar mein apne urdu ban kar

kuchh to junun ko apne taghayyur karna tha

KHun-e-jigar hi bah nikla aansu ban kar

ruh mein bhi kya utre hain mani is ke

yun to sarapa rahte ho ya-hu ban kar

yun to bayan us husn ka karna tha dushwar

aaya mere ashaar mein kuchh pahlu ban kar

kab kar den sairab kisi ko wo, un ke

sar se ghaTaen lipTi hain gesu ban kar

un ke ishaare yun bhi qatil hain 'KHalid'

aur qayamat hoti hai abru ban kar