aaenge wo kabhi magar zist ka eatibar kya

ā.eñge vo kabhī magar ziist kā e.atibār kyā

lā.egā rang dekhiye ālam-e-intizār kyā

apnī ḳhushī na aa.e haiñ apnī ḳhushī na jā.eñge

un ke harīm-e-nāz meñ ham ko hai iḳhtiyār kyā

qaid-e-qafas meñ ham-nafas guzrī ho jis kī zindagī

us ko ḳhizāñ kī kyā ḳhabar jānegā vo bahār kyā

hai ye hayāt-e-jāvedāñ hai yahī aish-e-sarmadī

haiñ jo vafā meñ lazzateñ jaane sitam-shi.ār kyā

bāzī-e-ishq haar kar baiThe haiñ be-ḳhabar se ham

suud hai kyā ziyāñ hai kyā naqd hai kyā udhār kyā

kashmakash-e-hayāt hai raunaq-e-mahfil-e-hayāt

dil ko hamāre jiite jī aa.egā phir qarār kyā

mausam-e-gul ke aate hī ham to asiir ho ga.e

qaid-e-qafas hai ai 'nazīr' hāsil-e-nau-bahār kyā

aaenge wo kabhi magar zist ka eatibar kya

laega rang dekhiye aalam-e-intizar kya

apni KHushi na aae hain apni KHushi na jaenge

un ke harim-e-naz mein hum ko hai iKHtiyar kya

qaid-e-qafas mein ham-nafas guzri ho jis ki zindagi

us ko KHizan ki kya KHabar jaanega wo bahaar kya

hai ye hayat-e-jawedan hai yahi aish-e-sarmadi

hain jo wafa mein lazzaten jaane sitam-shiar kya

bazi-e-ishq haar kar baiThe hain be-KHabar se hum

sud hai kya ziyan hai kya naqd hai kya udhaar kya

kashmakash-e-hayat hai raunaq-e-mahfil-e-hayat

dil ko hamare jite ji aaega phir qarar kya

mausam-e-gul ke aate hi hum to asir ho gae

qaid-e-qafas hai ai 'nazir' hasil-e-nau-bahaar kya