aafat-e-jaan us pari se dil lagana ho gaya

āfat-e-jāñ us parī se dil lagānā ho gayā

us ko kyā chāhā ki ik dushman zamāna ho gayā

paañv vo kab aate the ab paañv meñ mehñdī lagī

ye to ab un ke liye ḳhāsā bahānā ho gayā

dekh leñge us ke darbāñ ko bhī ab to kyā kaheñ

gar kisī taqrīb us kūche meñ jaanā ho gayā

dil ko paayā ham ne siine meñ taḌapte loTte

gosh-zad jab apne sher-e-āshiqāna ho gayā

kyā karegā ḳhuld ko le kar vo batlā to sahī

kūcha-e-saffāk meñ jis kā Thikānā ho gayā

ḳhirman-e-tāb-o-tavāñ ke vāste ai ham-nashīñ

ġhairat-e-sad-barq us kā muskurānā ho gayā

koh-e-ġham tere marīz-e-hijr ne sar par dharā

nā-tavāñ terā yahāñ tak to tavānā ho gayā

yaad meñ us zulf-e-mushkīñ kī shab-e-furqat meñ 'aish'

jo girā aañsū kā qatra sañg-dānā ho gayā

aafat-e-jaan us pari se dil lagana ho gaya

us ko kya chaha ki ek dushman zamana ho gaya

panw wo kab aate the ab panw mein mehndi lagi

ye to ab un ke liye KHasa bahana ho gaya

dekh lenge us ke darban ko bhi ab to kya kahen

gar kisi taqrib us kuche mein jaana ho gaya

dil ko paya hum ne sine mein taDapte loTte

gosh-zad jab apne sher-e-ashiqana ho gaya

kya karega KHuld ko le kar wo batla to sahi

kucha-e-saffak mein jis ka Thikana ho gaya

KHirman-e-tab-o-tawan ke waste ai ham-nashin

ghairat-e-sad-barq us ka muskurana ho gaya

koh-e-gham tere mariz-e-hijr ne sar par dhara

na-tawan tera yahan tak to tawana ho gaya

yaad mein us zulf-e-mushkin ki shab-e-furqat mein 'aish'

jo gira aansu ka qatra sang-dana ho gaya