aaftab ab nahin nikalne ka

āftāb ab nahīñ nikalne kā

daur aayā sharāb Dhalne kā

saañp kahte haiñ zulf ko shā.ir

kaam karte haiñ muñh kuchalne kā

laakh ham chiknī-chupḌī baat kareñ

un kā dil ab nahīñ phisalne kā

sifat-e-lab meñ sher kahte haiñ

ab irāda hai la.al ugalne kā

kūTte haiñ jo apnā ham siina

hai evaz chhātiyāñ masalne kā

kyuuñ na har tarz meñ ho baat na.ī

paañ hai qaabū zabāñ badalne kā

ek bose kī bhī jamā.e ab

qasd hai un ko missī malne kā

naḳhl-e-mātam ke saa.e meñ na Thahar

hai musāfir jo qasd chalne kā

chashm-poshī se tifl-e-ashk apnā

Dhañg sīkhā hai ab machalne kā

hifz-e-tīr-e-nigah hai ain ḳhatā

nahīñ paiġhām maut Talne kā

ham bhī khelā kareñge jaan par ab

shaġhl achchhā hai dil bahalne kā

'mehr' hirbā se dostī tā-chand

ġham nahīñ rañg ke badalne kā

aaftab ab nahin nikalne ka

daur aaya sharab Dhalne ka

sanp kahte hain zulf ko shair

kaam karte hain munh kuchalne ka

lakh hum chikni-chupDi baat karen

un ka dil ab nahin phisalne ka

sifat-e-lab mein sher kahte hain

ab irada hai lal ugalne ka

kuTte hain jo apna hum sina

hai ewaz chhatiyan masalne ka

kyun na har tarz mein ho baat nai

pan hai qabu zaban badalne ka

ek bose ki bhi jamae ab

qasd hai un ko missi malne ka

naKHl-e-matam ke sae mein na Thahar

hai musafir jo qasd chalne ka

chashm-poshi se tifl-e-ashk apna

Dhang sikha hai ab machalne ka

hifz-e-tir-e-nigah hai ain KHata

nahin paigham maut Talne ka

hum bhi khela karenge jaan par ab

shaghl achchha hai dil bahalne ka

'mehr' hirba se dosti ta-chand

gham nahin rang ke badalne ka