aag hai phaili hui kali ghaTaon ki jagah

aag hai phailī huī kaalī ghaTāoñ kī jagah

bad-duā.eñ haiñ laboñ par ab duāoñ kī jagah

intiḳhāb-e-ahl-e-gulshan par bahut rotā hai dil

dekh kar zāġh-o-zaġhan ko ḳhushnavāoñ kī jagah

kuchh bhī hotā par na hote pāra-pāra jism-o-jāñ

rāhzan hote agar un rahnumāoñ kī jagah

luT ga.ī is daur meñ ahl-e-qalam kī aabrū

bik rahe haiñ ab sahāfī be-savāoñ kī jagah

kuchh to aatā ham ko bhī jaañ se guzarne kā maza

ġhair hote kaash 'jālib' āshnāoñ kī jagah

aag hai phaili hui kali ghaTaon ki jagah

bad-duaen hain labon par ab duaon ki jagah

intiKHab-e-ahl-e-gulshan par bahut rota hai dil

dekh kar zagh-o-zaghan ko KHushnawaon ki jagah

kuchh bhi hota par na hote para-para jism-o-jaan

rahzan hote agar un rahnumaon ki jagah

luT gai is daur mein ahl-e-qalam ki aabru

bik rahe hain ab sahafi be-sawaon ki jagah

kuchh to aata hum ko bhi jaan se guzarne ka maza

ghair hote kash 'jalib' aashnaon ki jagah