aag hote hain kabhi log dhuan hote hain

aag hote haiñ kabhī log dhuāñ hote haiñ

ek jaise to miyāñ ham bhī kahāñ hote haiñ

koī tahlīl bhī kar degā nahīñ sochā thā

soch aatī hī nahīñ thī ki ziyāñ hote haiñ

maiñ gavāhī meñ tumheñ ḳhvāb sunā.ūñ apnā

bhed mujh par to ḳhudā ke bhī 'ayāñ hote haiñ

jin kī āvāz qadam tez kiye detī hai

hote haiñ pyaar meñ kuchh log azaañ hote haiñ

ḳhvāhisheñ vaqt kī Tahnī se nahīñ jhaḌtī haiñ

ḳhvāb pachpan meñ bhī dekhe haiñ javāñ hote haiñ

zindagī rail kī paTrī pe le jaane vaale

pyaar ko pyaar samajh sūd-o-ziyāñ hote haiñ

maiñ ne ik 'umr usī shaḳhs ko DhūñDā 'sāhib'

vo jo kahtā thā ki zaḳhmoñ ke nishāñ hote haiñ

aag hote hain kabhi log dhuan hote hain

ek jaise to miyan hum bhi kahan hote hain

koi tahlil bhi kar dega nahin socha tha

soch aati hi nahin thi ki ziyan hote hain

main gawahi mein tumhein KHwab sunaun apna

bhed mujh par to KHuda ke bhi 'ayan hote hain

jin ki aawaz qadam tez kiye deti hai

hote hain pyar mein kuchh log azan hote hain

KHwahishen waqt ki Tahni se nahin jhaDti hain

KHwab pachpan mein bhi dekhe hain jawan hote hain

zindagi rail ki paTri pe le jaane wale

pyar ko pyar samajh sud-o-ziyan hote hain

main ne ek 'umr usi shaKHs ko DhunDa 'sahib'

wo jo kahta tha ki zaKHmon ke nishan hote hain