aag jo dil mein lagi hai wo bujha di jae

aag jo dil meñ lagī hai vo bujhā dī jaa.e

phir koī taaza ġhazal aaj sunā dī jaa.e

zīnat-e-jism bane ruuh ko chhalnī kar de

aisī har rasm zamāne se miTā dī jaa.e

sunte haiñ ishq kā bāzār bahut garm hai phir

qīmat-e-husn zarā aur baḌhā dī jaa.e

ik jhalak ke liye sau baar sar-e-bām gayā

ātish-e-shauq ko kuchh aur havā dī jaa.e

raaz siine meñ dabā hai jo sar-e-bazm kahūñ

sirf ik baar mujhe us kī razā dī jaa.e

zindagī dhuup meñ jalte hue kaaTī jis ne

saaya mil jaa.e koī us ko duā dī jaa.e

jā-ba-jā aks merī āñkhoñ meñ ubhre jis kā

us kī tasvīr bhī ab dil se haTā dī jaa.e

vaqt aajil hai safar tuul hai dam āñkhoñ meñ

ruḳh-e-jānāñ se naqāb ab to uThā dī jaa.e

tishnagī aañkh kī kam ho koī sūrat nikle

pas-e-parda hī jhalak kaash dikhā dī jaa.e

munjamid koh-e-nidā par hai taġhāful se tire

hiddat-e-chashm-e-karam us pe luTā dī jaa.e

muskurāte hue sar siine pe rakh kar bole

maraz-e-ishq hai lāzim hai davā dī jaa.e

ye bhī mumkin hai magar tab ki vo ḳhud aa ke kahe

baat jo dil ko dukhātī hai bhulā dī jaa.e

aag jo dil mein lagi hai wo bujha di jae

phir koi taza ghazal aaj suna di jae

zinat-e-jism bane ruh ko chhalni kar de

aisi har rasm zamane se miTa di jae

sunte hain ishq ka bazar bahut garm hai phir

qimat-e-husn zara aur baDha di jae

ek jhalak ke liye sau bar sar-e-baam gaya

aatish-e-shauq ko kuchh aur hawa di jae

raaz sine mein daba hai jo sar-e-bazm kahun

sirf ek bar mujhe us ki raza di jae

zindagi dhup mein jalte hue kaTi jis ne

saya mil jae koi us ko dua di jae

ja-ba-ja aks meri aankhon mein ubhre jis ka

us ki taswir bhi ab dil se haTa di jae

waqt aajil hai safar tul hai dam aankhon mein

ruKH-e-jaanan se naqab ab to uTha di jae

tishnagi aankh ki kam ho koi surat nikle

pas-e-parda hi jhalak kash dikha di jae

munjamid koh-e-nida par hai taghaful se tere

hiddat-e-chashm-e-karam us pe luTa di jae

muskuraate hue sar sine pe rakh kar bole

maraz-e-ishq hai lazim hai dawa di jae

ye bhi mumkin hai magar tab ki wo KHud aa ke kahe

baat jo dil ko dukhati hai bhula di jae