aag ke safhe pe naqsh-e-ma-o-man rah jaega

aag ke safhe pe naqsh-e-mā-o-man rah jā.egā

raakh meñ sachchā.ī kā zinda badan rah jā.egā

harf kī bārish thame to dhund se ma.anī ugeñ

likhne vaalā aap se guzregā fan rah jā.egā

ḳhvāhishoñ kā meñh nangī aañkh se jab bah chukā

chīḳhtā chinghāḌtā pīchhe badan rah jā.egā

yuuñ ḳhalā-bāzoñ pe barseñge shahāb-e-sāqib ab

jism jal jā.eñge baaqī pairahan rah jā.egā

janD par phir se kisī ghabrū kā tarkash rah gayā

hashr kā maidān ban ke ab ye ban rah jā.egā

aag kī dīvār phāñd aa.e to har manzil hai sahl

sar kī manzil se kahīñ pīchhe kafan rah jā.egā

aag ke safhe pe naqsh-e-ma-o-man rah jaega

rakh mein sachchai ka zinda badan rah jaega

harf ki barish thame to dhund se mani ugen

likhne wala aap se guzrega fan rah jaega

KHwahishon ka meinh nangi aankh se jab bah chuka

chiKHta chinghaDta pichhe badan rah jaega

yun KHala-bazon pe barsenge shahab-e-saqib ab

jism jal jaenge baqi pairahan rah jaega

janD par phir se kisi ghabru ka tarkash rah gaya

hashr ka maidan ban ke ab ye ban rah jaega

aag ki diwar phand aae to har manzil hai sahl

sar ki manzil se kahin pichhe kafan rah jaega