aag ko phul kahe jaen KHird-mand apne

aag ko phuul kahe jaa.eñ ḳhirad-mand apne

aur āñkhoñ pe rakheñ diid ke dar band apne

laakh chāhā ki ġham-o-fikr-e-jahāñ se chhūTeñ

jāma-e-dil pe ye sajte rahe paivand apne

shahr meñ dhuum machātī rahī kyā taaza havā

ham ne dar vā na kiyā ham haiñ gila-mand apne

sat.h-e-qirtās pe utre na tirī gul-badanī

kitne aajiz hue jaate haiñ hunar-mand apne

marhala tai na huā ahl-e-tazabzub se koī

jurm-e-tashkīk se baiThe rahe pāband apne

aisā kuchh gardish-e-daurāñ ne rakhā hai masrūf

mājare ho na sake ham se qalam-band apne

ham to mar jaate ġham-e-hijr ke hāthoñ 'shāhid'

dasht āfāq meñ hote na agar chand apne

aag ko phul kahe jaen KHirad-mand apne

aur aankhon pe rakhen did ke dar band apne

lakh chaha ki gham-o-fikr-e-jahan se chhuTen

jama-e-dil pe ye sajte rahe paiwand apne

shahr mein dhum machati rahi kya taza hawa

hum ne dar wa na kiya hum hain gila-mand apne

sath-e-qirtas pe utre na teri gul-badani

kitne aajiz hue jate hain hunar-mand apne

marhala tai na hua ahl-e-tazabzub se koi

jurm-e-tashkik se baiThe rahe paband apne

aisa kuchh gardish-e-dauran ne rakha hai masruf

majare ho na sake hum se qalam-band apne

hum to mar jate gham-e-hijr ke hathon 'shahid'

dasht aafaq mein hote na agar chand apne