aaghaz-e-ashiqi ka allah re zamana

āġhāz-e-āshiqī kā allāh re zamāna

har baat bahkī bahkī har gaam vālihāna

vo sajda-hā-e-paiham vo un kā āstāna

ai kaash lauT aa.e guzrā huā zamāna

kaunain kī tavajjoh us be-ruḳhī pe sadqe

hoñToñ pe hai tabassum tevar muḳhālifāna

mujh ko na thī gavārā apnī shikast lekin

kyā kahiye us nazar kā andāz-e-fātehāna

sau baar dekh kar bhī yuuñ muztarib haiñ nazreñ

jaise guzar gayā ho dekhe hue zamāna

mahsūs ho chalī haiñ tanhā.iyāñ unheñ bhī

rakkhe ḳhudā salāmat pindār-e-āshiqāna

kyā iḳhtiyār apnā majbūriyoñ pe dil kī

maanā ki mashvara hai nāseh kā muḳhlisāna

phir chāñd aur sitāre phailā rahe haiñ zulmat

ek terī yaad se thā raushan siyāh-ḳhāna

rabt-e-nigāh-o-dil ko muddat huī hai 'arshī'

un kā mirā ta.āruf ab tak hai ġhā.ebāna

aaghaz-e-ashiqi ka allah re zamana

har baat bahki bahki har gam walihana

wo sajda-ha-e-paiham wo un ka aastana

ai kash lauT aae guzra hua zamana

kaunain ki tawajjoh us be-ruKHi pe sadqe

honTon pe hai tabassum tewar muKHalifana

mujh ko na thi gawara apni shikast lekin

kya kahiye us nazar ka andaz-e-fatehana

sau bar dekh kar bhi yun muztarib hain nazren

jaise guzar gaya ho dekhe hue zamana

mahsus ho chali hain tanhaiyan unhen bhi

rakkhe KHuda salamat pindar-e-ashiqana

kya iKHtiyar apna majburiyon pe dil ki

mana ki mashwara hai naseh ka muKHlisana

phir chand aur sitare phaila rahe hain zulmat

ek teri yaad se tha raushan siyah-KHana

rabt-e-nigah-o-dil ko muddat hui hai 'arshi'

un ka mera taaruf ab tak hai ghaebana