aaghaz-e-gul hai shauq magar tez abhi se hai

āġhāz-e-gul hai shauq magar tez abhī se hai

ya.anī havā-e-bāġh junūñ-ḳhez abhī se hai

josh-e-talab hī maujib-e-darmāñdagī na ho

manzil hai duur aur qadam tez abhī se hai

kyā irtibāt-e-husn-o-mohabbat kī ho umiid

vo jān-e-shauq ham se kam-āmez abhī se hai

tartīb-e-kārvāñ meñ bahut der hai magar

āvāza-e-jaras hai ki mahmez abhī se hai

pahlī hī zarb-e-tesha se koh-e-girāñ hai chuur

hasrat-ma.āl satvat-e-parvez abhī se hai

kyā jaane mai-kashoñ kā ho kyā hashr sub.h tak

saaqī kī har nigāh dil-āvez abhī se hai

ye ibtidā-e-shauq ye pur-shauq dil mirā!

ik jām-e-ātishīñ hai ki labrez abhī se hai

'tābish' bharī bahār meñ koī bichhaḌ gayā

ab ke chaman meñ bū-e-ḳhizāñ tez abhī se hai

aaghaz-e-gul hai shauq magar tez abhi se hai

yani hawa-e-bagh junun-KHez abhi se hai

josh-e-talab hi maujib-e-darmandagi na ho

manzil hai dur aur qadam tez abhi se hai

kya irtibaat-e-husn-o-mohabbat ki ho umid

wo jaan-e-shauq hum se kam-amez abhi se hai

tartib-e-karwan mein bahut der hai magar

aawaza-e-jaras hai ki mahmez abhi se hai

pahli hi zarb-e-tesha se koh-e-giran hai chur

hasrat-maal satwat-e-parwez abhi se hai

kya jaane mai-kashon ka ho kya hashr subh tak

saqi ki har nigah dil-awez abhi se hai

ye ibtida-e-shauq ye pur-shauq dil mira!

ek jam-e-atishin hai ki labrez abhi se hai

'tabish' bhari bahaar mein koi bichhaD gaya

ab ke chaman mein bu-e-KHizan tez abhi se hai