aaghaz-e-jafa yaad na anjam-e-wafa yaad

āġhāz-e-jafā yaad na anjām-e-vafā yaad

jab sāmne tum aa.e to kuchh bhī na rahā yaad

ab yaad nasheman hai na bijlī kī jafā yaad

nikle the kuchh aise ki chaman tak na rahā yaad

jis ne mirī soī huī duniyā ko jagāyā

aa jaatī hai ab bhī vo mohabbat kī sadā yaad

ehsās sā hotā hai dhaḌakte hue dil ko

shāyad mujhe bhūlī huī duniyā ne kiyā yaad

jo dil meñ tamannā thā jo āñkhoñ meñ sharar thā

ab bhī hai us aañsū ke Tapakne kī sadā yaad

dīdār kī hasrat thī tamannā thī gila thā

jab hosh mujhe aayā to kuchh bhī na rahā yaad

vo ātish-e-ruḳhsār na vo sho.ala-o-sāġhar

kuchh bhī nahīñ maḳhmūr nigāhoñ ke sivā yaad

jis ne ki milā.e the sitāroñ se sitāre

ab tak hai us añgḌā.ī ke lene kī adā yaad

phūloñ meñ vo halkī sī kalī khil ga.ī jaise

ai 'fazl' vo andāz-e-tabassum hī rahā yaad

aaghaz-e-jafa yaad na anjam-e-wafa yaad

jab samne tum aae to kuchh bhi na raha yaad

ab yaad nasheman hai na bijli ki jafa yaad

nikle the kuchh aise ki chaman tak na raha yaad

jis ne meri soi hui duniya ko jagaya

aa jati hai ab bhi wo mohabbat ki sada yaad

ehsas sa hota hai dhaDakte hue dil ko

shayad mujhe bhuli hui duniya ne kiya yaad

jo dil mein tamanna tha jo aankhon mein sharar tha

ab bhi hai us aansu ke Tapakne ki sada yaad

didar ki hasrat thi tamanna thi gila tha

jab hosh mujhe aaya to kuchh bhi na raha yaad

wo aatish-e-ruKHsar na wo shoala-o-saghar

kuchh bhi nahin maKHmur nigahon ke siwa yaad

jis ne ki milae the sitaron se sitare

ab tak hai us angDai ke lene ki ada yaad

phulon mein wo halki si kali khil gai jaise

ai 'fazl' wo andaz-e-tabassum hi raha yaad