aaghaz-e-mohabbat mein barson yun zabt se humne kaam liya

āġhāz-e-mohabbat meñ barsoñ yuuñ zabt se ham ne kaam liyā

jab huuk kaleje meñ uTThī to hāthoñ se dil thaam liyā

us rashk ke hāthoñ ek na ik har roz hī daaġh uThāte rahe

ham choT jigar par khā baiThe jab ġhair ne terā naam liyā

āñkheñ vo jhukeñ milte milte rahe hosh-o-ḳhirad jaate jaate

kuchh sharm ne un ko rok liyā kuchh zabt ne ham ko thaam liyā

insān kī thī ye tāb-o-tavāñ jo bār-e-mohabbat uThā saktā

ek ye bhī hai ehsān tirā kyā us se tū ne kaam liyā

sahrā meñ ThanDe vaqt hameñ yaad aa.ī jo us kī jalvagarī

kuchh aisī huī vahshat dil ko dam jā ke zer-e-bām liyā

aur us ke sivā kuchh kah na sake pūchhā jo kisī ne haal hai kyā

āñkhoñ se aañsū bahne lage hāthoñ se kaleja thaam liyā

luuTā terī donoñ āñkhoñ ne paayā jo mire dil ko tanhā

jo ek ne sabr shakeb liyā to ek ne chain ārām liyā

ab tak to ḳhabar lī us ne mirī jis vaqt koī uftād paḌī

jab Thokareñ khā kar girne lagā haath us ne lapak kar thaam liyā

ham laa.eñ kahāñ se vo āñkheñ jo tum ko pashemāñ dekh sakeñ

ab kaisī nadāmat jab ham ne sab apne sar ilzām liyā

mahrūmī-e-qismat kyā kahiye ehsān kiyā kab saaqī ne

paimāna-e-umr chhalak hī gayā jab haath meñ apne jaam liyā

mauzūñ jo hue jazbāt-e-dil jab sher-e-'hafīz' paḌhā ham ne

sunte hī donoñ hāthoñ se sāme.a ne kaleja thaam liyā

aaghaz-e-mohabbat mein barson yun zabt se hum ne kaam liya

jab huk kaleje mein uTThi to hathon se dil tham liya

us rashk ke hathon ek na ek har roz hi dagh uThate rahe

hum choT jigar par kha baiThe jab ghair ne tera nam liya

aankhen wo jhuken milte milte rahe hosh-o-KHirad jate jate

kuchh sharm ne un ko rok liya kuchh zabt ne hum ko tham liya

insan ki thi ye tab-o-tawan jo bar-e-mohabbat uTha sakta

ek ye bhi hai ehsan tera kya us se tu ne kaam liya

sahra mein ThanDe waqt hamein yaad aai jo us ki jalwagari

kuchh aisi hui wahshat dil ko dam ja ke zer-e-baam liya

aur us ke siwa kuchh kah na sake puchha jo kisi ne haal hai kya

aankhon se aansu bahne lage hathon se kaleja tham liya

luTa teri donon aankhon ne paya jo mere dil ko tanha

jo ek ne sabr shakeb liya to ek ne chain aaram liya

ab tak to KHabar li us ne meri jis waqt koi uftad paDi

jab Thokaren kha kar girne laga hath us ne lapak kar tham liya

hum laen kahan se wo aankhen jo tum ko pasheman dekh saken

ab kaisi nadamat jab hum ne sab apne sar ilzam liya

mahrumi-e-qismat kya kahiye ehsan kiya kab saqi ne

paimana-e-umr chhalak hi gaya jab hath mein apne jam liya

mauzun jo hue jazbaat-e-dil jab sher-e-'hafiz' paDha hum ne

sunte hi donon hathon se samea ne kaleja tham liya