آگہی نے یہ راز پایا ہے

آگہی نے یہ راز پایا ہے

روشنی کا ثبوت سایا ہے

اپنے غم کا حساب لایا ہے

جو بھی غم خوار بن کر آیا ہے

دیکھیے دل پہ کیا گزر جائے

کوئی رہ رہ کے یاد آیا ہے

سرفرازی پہ بھولنے والو

غم بھی خوشیوں کے ساتھ آیا ہے

ان سے وابستگی کا کیا کہنا

اپنا ہو کر بھی دل پرایا ہے

عشق نے ہر مقام سے ہٹ کر

رنگ اپنا الگ جمایا ہے

ذکر ہے جس کی شادمانی کا

وہ بھی ماحول کا ستایا ہے

اے رشیؔ کاروبار الفت میں

جس نے کھویا ہے اس نے پایا ہے