aage jo hoga wo hoga KHair kar aaya hun main

aage jo hogā vo hogā ḳhair kar aayā huuñ maiñ

jo zabar bante the un ko zer kar aayā huuñ maiñ

haañ bahut mushkil to hai lekin ye nā-mumkin nahīñ

dard kī tuġhyāniyoñ meñ tair kar aayā huuñ maiñ

mar gayā hai koī mujh meñ us pe miTTī Dāliye

apnī saarī ḳhvāhishoñ ko Dher kar aayā huuñ maiñ

dard vahshat ranj-o-ġham tanhā.iyāñ shām-e-alam

jo mujhe ghere thiiñ un ko gher kar aayā huuñ maiñ

vo jise paane kī hasrat dil meñ muddat se rahī

us ke hī ḳhātir use ab ġhair kar aayā huuñ maiñ

kaam ye āsāñ nahīñ is meñ kaleja chāhiye

ishq kī vaadī se haañ ruḳh pher kar aayā huuñ maiñ

jaane kis kī diid kī hasrat liye dil meñ 'shahāb'

dasht-o-sahrā se bhī aage sair kar aayā huuñ maiñ

aage jo hoga wo hoga KHair kar aaya hun main

jo zabar bante the un ko zer kar aaya hun main

han bahut mushkil to hai lekin ye na-mumkin nahin

dard ki tughyaniyon mein tair kar aaya hun main

mar gaya hai koi mujh mein us pe miTTi Daliye

apni sari KHwahishon ko Dher kar aaya hun main

dard wahshat ranj-o-gham tanhaiyan sham-e-alam

jo mujhe ghere thin un ko gher kar aaya hun main

wo jise pane ki hasrat dil mein muddat se rahi

us ke hi KHatir use ab ghair kar aaya hun main

kaam ye aasan nahin is mein kaleja chahiye

ishq ki wadi se han ruKH pher kar aaya hun main

jaane kis ki did ki hasrat liye dil mein 'shahab'

dasht-o-sahra se bhi aage sair kar aaya hun main