آگے کی ٹھوکروں سے بچا کر چلا گیا

آگے کی ٹھوکروں سے بچا کر چلا گیا

اک شخص میرے رستے میں آ کر چلا گیا

وہ درد کے دوا کے دلوں کے سوال پر

غالبؔ کا ایک شعر سنا کر چلا گیا

جس کو کبھی بھلا نہ سکی ایک پل بھی میں

وہ مجھ کو ایک پل میں بھلا کر چلا گیا

اس نے سفر میں ساتھ تو میرا نہیں دیا

مجھ کو مگر وہ رستہ دکھا کر چلا گیا

دل چاہتا ہے اس کو ہی مرہم کے طور پر

جو شخص دل پہ زخم لگا کر چلا گیا

سوچو ذرا کہ کتنا دکھا ہوگا اس کا دل

ہنستے ہوئے جو اشک چھپا کر چلا گیا