آگے سے اپنی راہ جدا چاہتے ہیں ہم

آگے سے اپنی راہ جدا چاہتے ہیں ہم

ایسا سمجھ کہ دام وفا چاہتے ہیں ہم

آنکھوں کو خود ہی پڑھ لے کوئی آرزو نہ پوچھ

ہونٹھوں سے کیا بتائیں کہ کیا چاہتے ہیں ہم

رات آ گئی اب اپنی اداسی کا وقت ہے

اے کھڑکیو چراغ بجھا چاہتے ہیں ہم

اے پاسباں تو کھول دے یہ روزن قفس

کم از کم اپنا ذہن رہا چاہتے ہیں ہم

جنت کے راستے میں کہیں تیرگی نہ ہو

سو قبر پر بھی ایک دیا چاہتے ہیں ہم

اک جھیل کا کنارہ ہو جنگل ہو پیڑ ہوں

اک گھر وہیں پہ دشت‌ نما چاہتے ہیں ہم