aaghosh-e-ehtiyat mein rakh lun jigar kahin

āġhosh-e-ehtiyāt meñ rakh luuñ jigar kahīñ

Dartā huuñ le uḌe na kisī kī nazar kahīñ

ġhurbat meñ ajnabī kā bhī hotā hai ghar kahīñ

din-bhar kahīñ guzāriye yā rāt-bhar kahīñ

aġhyār huuñ kahīñ but-e-shorīda-sar kahīñ

sab kuchh ho aah meñ to ho apnī asar kahīñ

yuuñ uf na bāġh-e-dahr meñ barbādī ho koī

bulbul kā āshiyāñ hai kahīñ bāl-o-par kahīñ

maiñ aaj apnī aah kā kartā huuñ imtihāñ

hoñ āsmāñ zamīn na zer-o-zabar kahīñ

qaid-e-qafas meñ hasrat-e-parvāz kyuuñ rahe

sayyād jo uḌā de mire bāl-o-par kahīñ

rahtī hai un kī yaad mire dil meñ har ghaḌī

'auj' un ke dil meñ kaash ho merā bhī ghar kahīñ

aaghosh-e-ehtiyat mein rakh lun jigar kahin

Darta hun le uDe na kisi ki nazar kahin

ghurbat mein ajnabi ka bhi hota hai ghar kahin

din-bhar kahin guzariye ya raat-bhar kahin

aghyar hun kahin but-e-shorida-sar kahin

sab kuchh ho aah mein to ho apni asar kahin

yun uf na bagh-e-dahr mein barbaadi ho koi

bulbul ka aashiyan hai kahin baal-o-par kahin

main aaj apni aah ka karta hun imtihan

hon aasman zamin na zer-o-zabar kahin

qaid-e-qafas mein hasrat-e-parwaz kyun rahe

sayyaad jo uDa de mere baal-o-par kahin

rahti hai un ki yaad mere dil mein har ghaDi

'auj' un ke dil mein kash ho mera bhi ghar kahin