aah ban kar dil ke afsane zaban tak aa gae

aah ban kar dil ke afsāne zabāñ tak aa ga.e

aag bhaḌkī thī kahāñ sho'le kahāñ tak aa ga.e

ab to aa jaao ki rusvā ho na jaa.e zarf-e-dil

zabt-e-ġham ke marhale āh-o-fuġhāñ tak aa ga.e

ashk vo jin ko tire ġham se koī nisbat nahīñ

ban ke sho'le dāman-e-umr-e-ravāñ tak aa ga.e

is se baḌh kar aur kyā hogā mohabbat kā sila

mere ġham ke tazkire un kī zabāñ tak aa ga.e

ai ḳhudā-e-hashr itmām-e-karam meñ der kyā

terā manshā thā jahāñ tak ham vahāñ tak aa ga.e

naqsh-e-pā shams-o-qamar aur kahkashāñ gard-e-safar

kis kī dhun meñ ham makāñ se lā-makāñ tak aa ga.e

tere dar par jis ke sajdoñ ko milā husn-e-qubūl

us ke dar par sar jhukāne āsmāñ tak aa ga.e

miT gayā kotāhī-e-barq-e-tapāñ kā sab gila

ātish-e-gul ke sharāre āshiyāñ tak aa ga.e

muddatoñ dair-o-haram kī Thokareñ khā kar 'tufail'

bahr-e-sajda ham dar-e-pīr-e-muġhāñ tak aa ga.e

aah ban kar dil ke afsane zaban tak aa gae

aag bhaDki thi kahan sho'le kahan tak aa gae

ab to aa jao ki ruswa ho na jae zarf-e-dil

zabt-e-gham ke marhale aah-o-fughan tak aa gae

ashk wo jin ko tere gham se koi nisbat nahin

ban ke sho'le daman-e-umr-e-rawan tak aa gae

is se baDh kar aur kya hoga mohabbat ka sila

mere gham ke tazkire un ki zaban tak aa gae

ai KHuda-e-hashr itmam-e-karam mein der kya

tera mansha tha jahan tak hum wahan tak aa gae

naqsh-e-pa shams-o-qamar aur kahkashan gard-e-safar

kis ki dhun mein hum makan se la-makan tak aa gae

tere dar par jis ke sajdon ko mila husn-e-qubul

us ke dar par sar jhukane aasman tak aa gae

miT gaya kotahi-e-barq-e-tapan ka sab gila

aatish-e-gul ke sharare aashiyan tak aa gae

muddaton dair-o-haram ki Thokaren kha kar 'tufail'

bahr-e-sajda hum dar-e-pir-e-mughan tak aa gae