aah be-tasir hai nala rasa koi nahin

aah be-tāsīr hai naala rasā koī nahīñ

dard vo mujh ko milā jis kī davā koī nahīñ

dekhtā huuñ raah meñ muḌ muḌ ke har chehre ko maiñ

ham-safar kitne haiñ lekin ham-navā koī nahīñ

is se baḌh kar aur kyā hogā azāb-e-zindagī

aañkh sab rakhte haiñ lekin dekhtā koī nahīñ

paḌhte haiñ is daur ke arbāb-e-dānish roz-o-shab

vo sahīfe jin meñ ki bāb-e-duā koī nahīñ

vaqt par jo kaam aa jaa.e use achchhā kaho

ai dil-e-muztar yahāñ achchhā burā koī nahīñ

āgahī ke zo.am meñ kitne banā Daale the ruup

ab khulā ki apnā hī nām-o-pata koī nahīñ

tarjumān-e-ḳhār-o-ḳhas 'ahmad' hai pūchho un kā haal

lāla-o-gul ke jahāñ se vāsta koī nahīñ

aah be-tasir hai nala rasa koi nahin

dard wo mujh ko mila jis ki dawa koi nahin

dekhta hun rah mein muD muD ke har chehre ko main

ham-safar kitne hain lekin ham-nawa koi nahin

is se baDh kar aur kya hoga azab-e-zindagi

aankh sab rakhte hain lekin dekhta koi nahin

paDhte hain is daur ke arbab-e-danish roz-o-shab

wo sahife jin mein ki bab-e-dua koi nahin

waqt par jo kaam aa jae use achchha kaho

ai dil-e-muztar yahan achchha bura koi nahin

aagahi ke zoam mein kitne bana Dale the rup

ab khula ki apna hi nam-o-pata koi nahin

tarjuman-e-KHar-o-KHas 'ahmad' hai puchho un ka haal

lala-o-gul ke jahan se wasta koi nahin